Student Social Service Society
社會服務團
Chairperson: 馬路
係未開始prop之前，我同大部份莊員都唔認識，亦都唔知到咩係prop，淨係成日聽上莊話prop「勁辛苦」。由第一開始prep prop， 去唔同展覽搬紙皮、珍珠版，我就開始懷疑人生，到底我地係到做緊乜啊，將成架貨車咁多既紙皮搬上車又搬落車，再搬上hall，做到半夜三更，又辛苦，又要對住成堆紙皮訓，究竟自己為乜啊。然後我先發覺，其實仲未到主菜。執好紙皮同珍珠版，就正式要整game同砌dec，然後每日生活就係番ust,介紙皮，番ust，介紙皮，做到後來已經好似無咩知覺。咁既生活終於過左足足一個月，終於去到上大dec既一晚，果一晚仲係全年最凍果晚，我同莊員搬著大dec，由hall6經大斜，上到atrium，然後到凌晨上dec。我仲好記得果個晚上dec上得唔順利，我地大家一齊企係到食風食到大晒冷震，隻手係完全無晒知覺，但係我地依然堅持要將大dec上好，無一個話要番hall休息，無一個話好辛苦，因為我地係大家一齊捱，一齊撐住大家。去到真正prop開始我地日日promo自己，大聲chanting，儘管去到last chant其實大家已經沙晒聲，但係大家仍然盡全力大聲chant，因為我地係四蛇，我地唔可以刁四蛇既架。我同班莊員係過左漫長2個月「受難」既時間，依家仍然係呢度寫分享prop感言，係因為我有班好打得既莊員，個個都打不死，呢個就係四蛇，呢班就係我莊員，係我一世既莊員。
External Vice-Chairperson: Cheuk
Pro P，大概是辛苦的。由成莊當日直到今日的每一個畫面依然歷歷在目。還記得我們為了分sec位而到了旺角的cafe，還記得我們一同到了美食節、工展會等等去籌集物資，還記得由一月起我們便一同在科大prep Pro P。這些大大小小的回憶都深深地刻印在我的腦海裏。或許，這些回憶不都是快樂的，我們也經歷過挫折，我們也試過爭執。不過回想起來，這兩個月我辛苦得開心。如果未曾經歷過這兩個月，大概我的spring sem 只會充滿著無窮無盡的deadline和midterm吧。每當我感到失落，或憤怒時，安慰我鼓勵我的總是莊員，支持我的也總是莊員。最後不得不提及的必定是上莊的支持。如果沒有你們的提點和幫助，大概我們連Pro P也做不了吧。不知道離開了這支莊的人會不會看到這段感言，但不管你們之後為了甚麼而努力也好，我和莊員們也會支持你們的。最後的最後，多謝莊員支持，沒有你們，大概我也不會堅持下去。
謝謝你們。
Internal and Promotion Secretary: Cherry
由prep pro p到完咗成個pro p，雖然只係短短兩個月嘅時間，但係好似已經經歷咗好多嘢咁。 好多人都問過點解要上莊呢個問題，com莊初期我都唔識答，莽莽撞撞就決定咗要上莊，一開始大家都唔熟，又唔識溝通，成日都製造咗好多誤會。有段時間真係有啲唔開心，會質疑自己係咪做咗一個錯嘅決定，但係之後大家有咩意見都願意開心見誠咁攞出嚟傾，我諗呢個就係我地pro p嘅成績對得住自己嘅原因。
一開始prep pro p大家都未適應要chur，尤其是第一次去拎珍珠板嘅時候，唔係好主動咁問人，所以最後都唔係拎咗特別多。去多幾次呢啲展之後，我地開始越拎越多，所以先可以整到咁多game同dec。
整game同dec嘅時候真係有血有淚，由一開始揾唔到方向整得好慢，到後期紙皮珍珠板同埋痴閃紙都上哂手，其中最難忘嘅莫過於整大dec，當時又大風又毛毛雨，我地半夜係後山嘗試將隻大dec由平面起做立體，用咗大半夜先起到個頭，最後仲要被風吹跌咗，個陣真係灰咗，好彩最後都成功係pro p前一晚起到，先無白費到我地嘅一番心機。
係common5+6度過嘅呢一個月，有太多令我印象深刻嘅回憶片段，記得每次買完一大堆零食唔夠半個鐘就會清哂，記得夜晚莊員會彈結他jam歌，記得莊員會講啲過哂時嘅IQ題可以笑成日，記得一翻到hall攰到連涼都唔想沖就攤落床昏迷，記得見到每隻game每個dec完成個陣個份成功感，唔經唔覺咁就過咗一個月。
Pro p十日話長唔長，話短唔短。第一日通完頂成個人都無乜精神，又唔係好識yo人嚟玩，渾渾噩噩就過咗一日。不過第二日就開始周圍去拉人嚟玩，係counter嘅時候就不停介紹我地支莊，每日講到口水都乾埋，夜晚食飯嘅時候趴係枱就咁瞓著咗，然後食完飯就繼續整dec同開會，日日都好充實，忙到唔識攰，但係而家諗翻轉頭又覺得一日漫長得嚟又過得好快，眨下眼就捱完呢十日。
Pro P當中最難忘嘅一定係chanting。以前覺得chanting係成班人日曬雨淋咁嗌，好辛苦好chur，但係自己親身經歷又係另一回事。頭兩日連cheers都未背熟，更莫講話啲動作齊唔齊，雖然天氣幾涼爽，但係都覺得嗌到好攰把聲好痛。但係過多幾日，記得啲cheers同動作之後成件事好似熱血咗，嗌到最後幾日連聲都無埋，chur得嚟又好盡興。
Pro p係痛并快樂著嘅一段日子，痛係由prep pro p開始就無停過咁病，但係快樂嘅嘢多到數唔哂，每個人每件事對我而言都有唔同嘅感覺，有感動，有不捨，有驚喜，都有失落，但係呢段日子會成為莊期入面獨一無二嘅回憶。
有位莊員曾經講過，寧願做完後悔都唔好因為無做而後悔，但係我好慶幸pro p無令我後悔上莊，反而覺得同呢一班莊員一齊渡過咗pro p係一件令我畢生難忘嘅事，好感謝每位莊員，每位投票俾我地嘅member同埋每一位支持我地嘅人。
Promotion Secretary: Mandy
Prop話長唔長話短唔短。當我知道成個一月都要犧牲晒所有自己時間黎prep Prop嘅時候都有猶豫過自己應唔應該咁做。但係覺得人一世物一世，咩都要試一次，所以就決定左上莊。其實一開始準備嘅時候我先知道有好多野嘅設計都要由我去諗，就例如Soc牌，Soc file， Soc hoodie 等等，而最初個陣我有好多時候都無靈感，甚至有另過自己根本唔啱做里個位，不如就咁放棄算數。但係我又覺得都捱左咁耐啦，無理由唔繼續落去架嘛，同埋經過左差唔多成個月同大家prep野既日子，點會捨得個啲一齊做莊務，一齊玩既日子。其實prep prop話就話有一個月，但係我地就好似等到最後一個禮拜先生產力提高左十倍咁haha，連隻麥兜都係用一日時間揼出嚟。
到左真真正正prop個陣，對於無hall既我每一日都要七點起身九點翻到黎真係一個挑戰。雖然有好多時翻到黎都係得小貓幾隻甚至無人，有時拎起都幾激氣。但係見到大家都咁俾心機上一齊做好個prop佢就覺得就算幾辛苦都無所謂，一齊捱過其實都冇乜大不了。prop令我見識到點樣去係限嘅時間入邊煮百幾分嘢食，過程真係刻骨銘心。講起prop點可以唔提chanting。我一開始以爲last chant果日我會開心到乜咁，結果係成班女人一齊匿埋係chanting旗後面喊，其實我嗰陣覺得prop眨吓眼就過，突然間好空虛，一路喊一路chant都咪話唔樣衰。
如果你問我呢個prop做得最多嘅係乜嘢，我第一時間諗起嘅係不斷瘋狂咁戒紙皮，戒珍珠版。而prop令我嘗試左係學校唔同嘅地方瞓覺過夜，例如common 5+6,LC,atrium。呢啲經歷真係可一不可再。但係如果你問我prop令我得到啲咩，點解我要辛苦自己做啲咁嘅嘢。坦白講我答你唔到有咩實際嘅嘢我係得到，但係我知道我得到一班同我一樣咁傻嘅仲員，得到一班捱過咗prop仍然願意喺度一齊捱多成年肯去燃燒GPA嘅莊員。冇錯係人哋眼中我哋的確可能係好傻，點解要曬呢啲時間，但係我就覺得prop係我一生人都唔會忘記既回憶，跟住落黎既一年都會係一樣。所以加油啦咁多位xd
general secretary: Harold
當初決定上莊果時，我對未來一年要做既事都未算係好清晰地了解，promotion period亦唔例外。我地全莊由一月初開始prep pro p，由本身咩物資都冇，到經歷咗去工展會，美食節同玩具展拎紙皮同珍珠版之後，就用黎整唔同既dec同埋game。拎紙皮既過程絕對唔簡單，每位都要付出勞力同汗水去搬運，上落貨，每次搬完返hall都好似做完gym咁攰，不過都幾有成功感。
係短短既一個月裏面，我地nom莊差唔多日日見，彼此認識更多，prep既期間更遇到唔少難題，例如時間不足，或者設計未符合預期。一向勞作唔太好既我仲成日痴歪膠紙同界斜線，俾大家恥笑xd。同埋不時要出深水埗補買膠紙banner膠，又要拎一袋袋訂購咗既公仔禮物，都咪話唔辛苦，最癲一定係我地合力將個大蛇dec搬上大斜，真係可一不可再:)。
到咗真正Pro p階段，我地要每日9點開counter，set好場煮早餐，邀請同學仔黎玩game同做自介，嘗試踏出自己comfort zone，同其他素未謀面soc既莊員溝通。晏晝1點既chanting係最chur同消耗體力既環節，大家叫到聲嘶力竭既場面仲歷歷在目。最印象深刻既係大抽獎既時候，果陣好多學生嘅目光同放咗係我地度，成為atrium焦點，氣氛真係好熱鬧。
最後果日完Pro p果時成個人都鬆晒，雖然呢兩個月過得一D都唔容易，但成為我喺科大最值得紀念既事。
Internal Vice-Chairperson: Chris
由成莊到pro p嘅過程可以話係有血有淚。
記得我哋第一次去m嘢果次我哋去咗灣仔會展打算可以m到d珍珠板同紙皮。雖然一開始plan好曬，但係去到嘅時候情況比我地想像中複雜，而且由於我哋係第一次做呢啲嘢，準備得唔夠好，結果好似要兩個人分一把界刀同埋買咗兩架手推車🤭喺會展跑完10幾個圈之後仲要返去科大抬d珍珠板同紙皮上hall，果陣真係想死😪😓不過好彩有好多上莊嚟咗幫手，如果唔係真係會搬到天光🙆🏻♂🙇🏻♂
到第二次搬野嘅時候係工展會，但係情況就冇咁好彩啦🙃果日喺維園超級大雨仲要同其他soc係到鬥快攞紙皮同珍珠版。然後次次又要講一大堆野先可以問到攤位啲人攞珍珠板同紙皮，有好幾次仲要俾人鬧走咗😓
攞到啲紙皮之後又怕會淋濕晒要極速咁跑返去放好，嗰刻真係啲紙皮仲重要過條命💁🏻♂
到差唔多完嘅時候又要同維園嗰啲保安你追我躲咁挽追逐戰去運d嘢出去。出到去當諗住終於完可以休息嘅時候原來好戲在後頭，架貨車因為冇位停所以泊咗喺天后附近，對當時以為已經完嘅我哋嚟講呢個消息真係晴天霹靂
結果大家夾手夾腳咁搬晒啲嘢，雖然個身由頭濕到落腳但係都無阻我哋熾熱嘅一顆心🤔😂💪🏻
由於我哋嘅莊員唔係個個都有hall住，我哋果次要將所有珍珠版同紙皮硬曬入其中一位莊員嘅房裏邊，搞到佢瞓覺都好似會有生命危險咁。
果斷時間佢冇比啲嘢跌落嚟軋死，佢都幾好命下。😂😂😂😂
之後嘅時間我因為個人原因離開咗一陣而free ride 咗大家，到返嚟嘅時候已經係整緊遊戲同埋牌匾嘅時候。嗰陣時係最辛苦但都係最開心嘅時候，大家一齊守夜一齊整遊戲一齊食飯，同其他莊員好快就熟絡左好多。雖然好辛苦，當中又發生左好多好不愉快嘅事，但係我哋個個都好似不打不相識咁，嘈完一陣之後又係到攬頭攬頸。係prep pro p期間最難忘嘅事有兩件， 第一件係守夜嗰陣我張床墊被其他莊員瞓
結果自己走咗落去下面餐廳瞓😆
仲有一件是係嗰陣我哋要砌好個蛇大dec，要將所有角鐵搬去後山砌，我就自動請纓咁攬晒所有角鐵搬咗落去，放低晒先發現其他莊員推住架空嘅手推車嚟緊，重講一句唔好意思唔記得同你講有手推車😤😤
雖然係好微不足道嘅事，但係對我來講真係非常難忘🙆🏻♂🙆🏻♂
整個prep pro p嘅過程中我哋仲發現咗大家一個非常有趣嘅共通點，就係當整啲遊戲唔係太完美嘅時候都會用熱溶膠硬爆。我哋好似前前後後出咗去幾次去買熱溶膠🙈🙈🙈
由於時間緊迫同埋個大dec太高嘅關係我哋要推大斜上去atrium。
當時非常大風同埋個大dec又太長好擋風，係搬嘅過程中我哋不斷聽到大dec撕裂嘅聲音🤭
最搞笑嘅係我哋希望寓工作於娛樂一路搬一路聽歌，其中一位莊員用手機播緊小白嘅時候唔小心放咗個手機入大dec裏邊攞唔返出嚟，要去到Atrium嘅時候成個人伸入個蛇頭入面搵返出嚟🤫🤫
預備好counter嘅過程可以話係難題一浪接一浪，首先係我哋個大dec因為個頭太重所以要係中間再硬爆一條角鐵，然後當我地掛牌匾嘅時候又冇睇清楚而倒轉左😑
幾經辛苦終於開始pro p
我由一個完全唔識點樣chanting嘅人變成發夢都識得嗌出嚟，由把聲完好無缺叫到聲嘶力竭講都講唔到野。四蛇同你講早晨，嚟四蛇counter玩下 呢啲句子已經變咗我嘅口頭禪。
我哋亦由怕怕醜醜變成左面皮成尺厚😳
有人話pro p係會令人瘦咗，但係我自己就反而食多咗嘢同肥咗，煮下午茶嘅時候都唔知自己偷食咗幾多野🙈
係煮嘢食嘅過程中再次見識到我哋serenus硬爆嘅實力，過程就唔多講啦但總之其他人食完冇事就得啦😏
到polling嘅時候以為唔使着件粉紅色hoodie同埋有得上堂就輕鬆好多，點知要企喺concourse度不斷咁喺度問人哋係咪四蛇member同埋投左票未
仲記得自己講吓講吓講咗做你好啊我係四蛇member😂😂😂😂
自己polling完咗見到其他soc喺度polling先發現自己嗰陣時係幾咁煩同神憎鬼厭😜😜
總括而言雖然由成莊到而家都真係好chur好辛苦 又有好多唔開心嘅事發生左😢
但係真係好開心識到一班好莊員好戰友，希望可以之後一年一齊chur一齊硬爆一齊捱落去，繼續竭盡所能持之以恆咁做好四蛇💪🏻💪🏻
Financial Secretary: Alone
Promotion Period眨下眼就過左去，雖然係Pre-Pro P同Pro P期間有好多野做，好辛苦，但係依家諗返起都覺得好熱血，超青春，勁開心！
Pre-Pro P個時大家一齊去會展、工展會拎珍珠板同紙皮箱，起初我都未習慣，所以拎得唔多，但係後來試多幾次之後，我都進步左，拎左唔少野，令我地係之後整game整dec個時都有充足嘅物資。
講到整game同整dec就係考驗我地創意同埋手工嘅時候啦。一開始我整野都幾kam下：Cut錯珍珠板size、貼野貼錯方向，都幾辛苦下。不過到左Pro P個陣，聽到大家都讚我整嘅game好玩個時，我都好開心，證明Pre-Pro P花嘅時間同心血有人欣賞！
之於Pre-Pro P同Pro P最深刻嘅一定係搬大dec行大斜同Chanting！好記得搬大dec個晚好大風，岩岩開始搬真係好凍，但係搬嘅過程好熱血、好青春，最後睇到我地隻大dec成形，真係好感動！Chanting都係我最深刻嘅事，最搞笑係我發現自己把聲好奇怪！大嗌Chanting個時就會聲沙，但係嗌完把聲又無咩事，我到依家都唔係好明點解，有無人可以解答下呢？點都好，Pro P絕對係我一個最青春、最難忘、最開心嘅回憶！
Publication and human resources Secretary: ciara
講起Prop，好似發左一場好耐嘅夢咁，經歷左好多、製造左好多回憶。
由Prep Prop開始，個個星期都去工展會、美食節、玩具展跑黎跑去，攞紙皮、拆珍珠板、拎玩具，經過左咁多次展覽，自己面皮應該厚左成吋，如果係以前嘅我，一定會覺得做呢啲事好奇怪，但係當成班人一齊去做嘅時候，就會覺得呢件事好正常，拎物資呢個過程其實都唔算辛苦，最攰係要將啲珍珠板搬上貨車、車返科大、再抬上Hall，每次完展之後再睇返一班莊員努力嘅成果，真係好有成功感。
係呢度借個機會多謝上莊有兩次都肯抽空黎幫我地呢班迷途小羔羊。
之後到落手設計同製作遊戲啦，一開始我地嘅進度其實都有啲慢，無論係Cut紙皮定用熱溶膠都好，我地一開始都手殘，仲好記得有啲莊員攞住間尺都畫唔到直線、又Cut塊彎嘅紙皮出黎，後來好彩每個遊戲都有 ”Cheap cheap designer”帶領住我地，我地做野順手左好多，見到啲遊戲慢慢成型真係好神奇，我地居然真係可以跟住設計圖整到個成果。
仲有一定要提整大Dec嘅過程，我地啲野都好趕，大Dec係一月最後一個星期先整，但係大家都小宇宙爆發，夾手夾腳好快就Cut到啲紙模、Cut珍珠板、拼珍珠板，到最後嗰晚仲要大家守後山看住條大蛇，嗰晚我冇留係科大，第二日知道係新界低兩度、海邊再低兩度嘅情況下，好多莊員守到個人震曬，知道嗰下真係心痛同內疚，所以之後無論發生啲咩，都好想同大家行落去。
講咁耐終於到Prop，好多人見到我地夜晚係度砌Game都會話：「哇你地個Game好靚，點玩咖，我聽日會同Friend一齊黎玩咖」，或者到個Game面世嘅時候，啲人會話：「正啊，呢個點整，好勁啊」，甚至有其他U嘅朋友見到我地Instagram嘅相，會同我地講：「你地Prop好Champ」，就算有啲遊戲唔係我整出黎，但我都會對自己莊員感到驕傲，證明我地咁耐以黎嘅努力有人欣賞。
Pro P雖然真係好辛苦，但係拉近左莊員之間嘅關係，一齊喊過、一齊笑過、一齊嬲過，了解大家嘅低線係邊，日後就知點樣和和氣氣做野，唔怕激嬲人啦。嗰時日對夜對，依加完左Pro P見少一日都覺得好唔習慣。
好記得莊員成日提住一句說話：「捱過左就係自己咖啦。」依加都唔太覺得捱左咁耐有咩係屬於自己，成日問自己到底呢段時間得到啲咩？我都有諗過放棄，但令我留底嘅力量就係來自你地。
莊員們，以後一齊捱落去啦！💕